Лисичанск мэры шәһәрне торгызу турында: Дистә еллар кул тимәгән эшләрне башкарабыз

Хәзерге вакытта Лисичанскида инфраструктура тулысынча алыштырыла. Шул исәптән Татарстан ярдәмендә дә дистә еллар кул тимәгән эшләр башкарыла, дип белдерде шәһәр мэры Эдуард Сахненко «Татар-информ» агентлыгына.

«Бездә инфраструктура, җылылык һәм су белән тәэмин итү, барлык челтәрләр тулысынча алыштырыла. Без чынлыкта дистә еллар кул тимәгән эшләрне башкарабыз, аварияләрне киметергә мөмкинлек бирә торган яңа технологияләргә һәм тагын да җитдирәк материалларга күчәбез», - дип искәртте шәһәр башлыгы.

Сахненко шулай ук Лисичанскины тулысынча торгызу өчен зур күләмдә эш башкарырга кирәклеген билгеләп үтте.

«Без хәзер бөтен шәһәрне казып чыгарга, инженерлык челтәрләрендә тәртип урнаштырырга, эштә тотрыклылыкны тәэмин итәргә тиеш һәм шулай эшлибез дә. Эшнең күләме бик зур, өстәвенә шәһәр 48 чакрымга сузылган, йортлар 1710 елда ук төзелә башлаган. Барысы да үзгәреш кичерә. Бәлки читтән караганда бу күренмидер дә, әмма кешеләр тоя», - диде мэр.

Ул шеф төбәк буларак Татарстан Республикасының ярдәмен аерым билгеләп үтте.

«Безгә Татарстан мөмкин булганча ярдәм күрсәтә. Безнең хезмәткәрләр, катлаулы булса да, барыбер эшләячәкбез, ди. Безнең фикердәшләр командасы, шефларыбыз бар. Бригадалар Татарстан белгечләре белән көчәйтелде», - дип сүзен тәмамлады Сахненко.