Мөхәммәтшин Тукай районы казанышлары күргәзмәсен карады
Татарстан Дәүләт Советы Рәисе Фәрит Мөхәммәтшин Тукай районы казанышлары күргәзмәсен карады. Экспозиция буйлап экскурсияне аңа районның 2024 ел йомгаклары буенча коллегиясе алдыннан уздырдылар.
Күргәзмәнең иң кызыклы өлеше урамда урнашкан иде. Биредә дизель-газ двигательле КАМАЗлар, маскировка челтәрләре, шулай ук LOTOS маркалы автобуслар һәм йөк машиналары тәкъдим ителде.
«Килмәгән булсам, бездә мондый автомобиль заводы барлыкка килгәнен белмәгән дә булыр идем. Двигательдән тыш, калган бөтен нәрсә үзебезнең илдә җитештерелгән, башыннан азагына кадәр үзебездә эшләнгән һәм югары ихтыяҗга ия», - дип белдерде Мөхәммәтшин.
КАМАЗ базасында Россиянең яңа территорияләре өчен эшләнгән бронетранспортер исә күргәзмәнең «йөзек кашы» булды. Мондый автомобильләр территорияләрне миналардан арындыру өчен кирәк, дип сөйләделәр Мөхәммәтшинга.
Яңа бистәсе мәдәният йортында кунакларны җирле вокаль-инструменталь ансамбль каршы алды. Күрше бүлмәдә экспозициянең икенче өлеше урнашкан. Биредә Дәүләт Советы Рәисенә районның җитештерүдән алып агросәнәгать комплексына кадәр төрле өлкәләрдәге казанышлары һәм потенциалы турында сөйләделәр.