Әхмәтшин һәм Чжоу Лицюнь «Ростки» форумы һәм «Россия-Кытай» автойөреше турында сөйләште

Татарстан Республикасы вице-премьеры – Татарстан Республикасының Россия Федерациясендәге Тулы вәкаләтле вәкиле Равил Әхмәтшин Россиядә Кытай эшкуарлары берлеге рәисе Чжоу Лицюнь белән «РОСТКИ: Россия һәм Кытай – үзара файдалы хезмәттәшлек» III халыкара форумына әзерлек турында фикер алышты. Исегезгә төшерик, чара Татарстанда 18-19 августта узачак.

ТР Тулы вәкаләтле вәкиллеге матбугат хезмәте хәбәр иткәнчә, 4 меңнән артык Кытай компаниясен үз эченә алган берлекнең рәисе чираттагы форумны оештыру һәм уздыруда ярдәм күрсәтергә әзер.

Шулай ук Лицюнь Кытай эшкуарлары берлеге белән «Автодор» компаниясе августта бергәләп М12 трассасы буйлап «Екатеринбург-Казан-Мәскәү» маршруты нигезендә «Россия-Кытай» автойөрешен оештырырга планлаштыра, дип сөйләде.

Автойөреш ике ил арасындагы хезмәттәшлеккә һәм Бөек Җиңүнең 80 еллыгына багышланачак, дип билгеләп үтелә. Чарада әйдәп баручы Кытай автокомпанияләре катнашачак, дип өстәде берлек рәисе.