Башкортстанда конкурс игълан иттеләр, төп бүләк - ат

Башкортстан Республикасында конкурс игълан иттеләр. Катнашучыларга башкорт аты хөрмәтенә гимн язарга тиеш була. Җиңүчегә бүләк итеп башкорт токымлы ат биреләчәк. Бу хакта конкурсны оештыручылар «ВКонтакте»дагы төркемдә хәбәр итәләр.

Конкурста физик һәм юридик затлар, композиторлар, шагыйрьләр, музыкаль коллективлар һәм иҗат берлекләре катнаша ала. Текстны башкортча да, русча да язарга була.

Композиция биш минутлык, сыйфатлы тавыш белән яздырылырга, ә сүзләр һәм музыка текст вариантында һәм аудиоязмада бирелергә тиеш.

Эшләр 1 мартка кадәр кабул ителә. Мартта нәтиҗәләр игълан ителә һәм җиңүчене бүләкләячәкләр. Гимннар конкурсны оештыручылар төркеменә җибәрелә, диелә хәбәрдә.