«Ачык Университет» белем бирү проекты «20 гасыр — шәхесләрдә» курсын тәкъдим итә

«Ачык Университет» – татар телендә online һәм offline белем бирү проекты Татар китабы йорты мөдире Айдар Шәйхин белән «20 гасыр — шәхесләрдә» дип исемләнгән яңа курс тәкъдим итә. Бу хакта Бөтендөнья татар яшьләре форумы матбугат хезмәте яза.

«XX гасыр — әле кичә генә булган, әмма бик күп тарихчылар өйрәнә һәм эзләнә торган дәвер. Безгә Татарстан Республикасы буларак билгеле төбәк/дәүләтчелек формасы да, хәзерге татар мәдәнияте һәм сәнгате, гомумән, милләт турында карашлар — узган гасырның казанышлары. Озын-озак гасырны «тудырган» кешеләр исә үз өлкәләрендәге эшчәнлекләре белән тарихка кереп калганнар. Кайберләре онытылган, кайберләре миф-легендаларга чорналган, ә кайберләре — тулы бер символлар. Бу курс татар интеллектуаллары исемнәре аша татар тарихының бер дәверен күзалларга ярдәм итәчәк», – диелгән хәбәрдә.

Дәресләр Татарстан Республикасы Милли музее һәм Татар китабы йорты белән берлектә яздырылган.

• Курсны «Ачык Университет» сайтында тыңларга була.

• «Ачык Университет» – Бөтендөнья татар яшьләре форумының татар телендә online һәм offline белем бирү проекты. «Акыл фабрикасы» проекты кысаларыннан үсеп чыга һәм эшчәнлеген 2019 елның февраль аенда Казан шәһәрендә «Каһаннан алып Казан ханына кадәр» исемле тарих курсы белән башлап җибәрә. Бүгенге көндә Ачык Университет online һәм offline эшли. Курс ахырында курсны узу турында сертификат бирелә. Моннан тыш, рәсми рәвештә квалификацияне үстерү таныклыгын алырга да мөмкинлек бар.