Махсус хәрби операциядә катнашучы Зәй районы Әхмәт авылы егетенә машина җибәрделәр

Зәй районы Әхмәт авылыннан Веня кушаматын йөртүче махсус хәрби операциядә контракт буенча катнаша.«Веня» «УАЗ» машинасы алуда ярдәм сорап якташларына мөрәҗәгать итә. Аның мөрәҗәгатен күргән «Zаинск с Vами» волонтерлар төркеме җитәкчесе Елена Хисаметдинова машина алу өчен акча җыюны игълан итә. Бу хакта «Зәй яңалыклары» сайтында хәбәр ителә.

Ул яу кырында күрсәткән батырлыклары һәм фидакарьлеге өчен «Хәрби батырлык өчен», «Махсус хәрби операциядә катнашучы» медальләре белән бүләкләнгән.

«Мин чакырылыш буенча хәрби хезмәттә булмадым. Ә менә шундый вакытта читтә кала алмадым. 2023 елның августында контракт төзеп, илебез сагына бастым», — ди Веня.

«Машина алуда Яңа Чишмә районыннан хәрбиләр ярдәм кулы сузды. Алар автомобильне сатып алып, ремонтлады. Республика волонтерлары шулай бер-берсенә ярдәм итеп тыгыз элемтәдә эшли. Ә без — зәйлеләр аларга маскировкалау челтәрләре белән булышабыз», — ди Елена Викторовна.

«УАЗ» машинасы хәрби зонага күптән түгел озатылды. Ул хәрби егетләргә инде барып җиткән. Аның өчен якташыбыз «Веня»дан рәхмәт сүзләре җиткерелгән видеоязма килде.

«Полкташлар исеменнән гуманитар ярдәм җибәргән, машина алуда ярдәм итүче якташларыма бик зур рәхмәт. Дошман тар-мар ителеп, Җиңү безнең якта булачак!» — ди егет.