Рөстәм Миңнеханов «Крылья Барса» коллективын Россия чемпионатында җиңүе белән котлады

Бүген Татарстан Республикасы Рәисе Рөстәм Миңнеханов Казанның «Баскет-холл» спорт комплексында «Крылья Барса» баскетбол клубы коллективын тәбрик итте.

Искәртеп узабыз, узган сезонда «Крылья Барса» командасы үз тарихында беренче тапкыр «5х5» коляскадагы баскетбол буенча Россия чемпионы булды. Финалга килеп җиткәнче, казанлылар барлык биш матчта да җиңде. Нәтиҗәдә, Татарстан командасы турнирның 30 еллык тарихында беренче тапкыр чемпион калды.

Финалда «Крылья Барса» Санкт-Петербург җыелмасын 78:58 исәбенә отты.

Фото: © rais.tatarstan.ru

Рөстәм Миңнеханов узган сезонда команданың көчле чыгыш ясавын билгеләп үтте.

«Кадерле спортчылар, чакырылган иганәчеләр, дуслар, сезнең белән очрашуыма шатмын. Иң элек «Крылья Барса» баскетбол клубын 2024 елгы сезонда коляскадагы баскетбол буенча Россия чемпионатында җиңүе белән котларга телим. Команда титулга илткән юлда югары осталык, оешканлык һәм җиңүгә омтылыш күрсәтте. Көчле рухлы, нык холыклы булып калуыгыз безнең өчен аеруча кыйммәт. Сезнең һәркайсыгыз – безнең өчен үрнәк. Сез безгә чын көчнең кыенлыклар булмауда түгел, ә аларны җиңә белүдә икәнлеген күрсәтәсез. Һәркайсыгызга зур рәхмәт», - диде Рөстәм Миңнеханов.

Татарстан җитәкчесе шулай ук тренерлар штабына, клуб җитәкчелегенә һәм уенчыларның туганнарына аерым рәхмәт белдерде.

«Тренерлар, клуб җитәкчелеге, административ персонал, федерациягә эшләре өчен аерым рәхмәт әйтәм. Һәм, әлбәттә инде, туганнарыгызга, якыннарыгызга һәм бу юлда сезгә ярдәм күрсәткән һәркемгә аерым рәхмәт сүзләрен җиткерәм. Үземнең тарафтан сәламәтлек мөмкинлекләре чикле кешеләргә физик культура һәм спорт белән шөгыльләнү өчен мөмкин кадәр яхшырак шартлар булдыруда бөтен көчемне куячакмын», - диде Миңнеханов.

Үз чиратында, «Крылья Барса» баскетбол клубының баш тренеры Сергей Чистяков спортчыларга карата мөнәсәбәте һәм командага ярдәм күрсәткәне өчен Татарстан җитәкчелегенә рәхмәт белдерде.