Зәйдән махсус операциядә катнашучы хәрби автомобиль өчен волонтерларга рәхмәт әйтте

Зәй һәм Яңа Чишмә волонтерлары махсус операциядә катнашучы хәрбигә автомобиль алырга ярдәм итте. Зәй егете Венер (хәрби кушаматы – Веня) контракт буенча хезмәт итә. Узган ел ахырында Зәйнең «Масксети Zаинск с Vами» волонтерлар төркеме машина сатып алу өчен акча җыя башлаган.

«Мондый ихтыяҗ турында очраклы рәвештә белдем. Акча җыярга керештек, акрынлап җибәрә башладылар, һәм кинәт Яңа Чишмәдән сугышчан туганнарыбыз үз ярдәмен тәкъдим итте. Без андагы волонтерлар белән дус булгач һәм аларга маскировка челтәрләре белән еш кына ярдәм иткәч, алар безгә машина алырга булышты. Волонтерлар арасында менә шундый сугышчан туганлык хакимлек итә», - дип сөйләде Зәйдә маскировка челтәрләре әзерләү буенча волонтерлар хәрәкәте җитәкчесе Елена Хисаметдинова.

«УАЗ» автомобилен 2025 елның гыйнвар башында Яңа Чишмәдән махсус хәрби операция зонасына озаталар. Веня аны алгач, видеохәбәр җибәрә, автомобиль сатып алуда катнашкан һәркемгә рәхмәтен җиткерә.

«Гуманитар ярдәм өчен бик зур рәхмәт. Дошман тар-мар ителәчәк һәм җиңү безнең якта булачак!» - дип белдерә хәрби видеомөрәҗәгатьтә.

Элегрәк ТР Рәисе Рөстәм Миңнеханов Татарстан Дәүләт Советына еллык юлламасында махсус хәрби операциядә катнашучыларга ярдәм күрсәтүгә мөһим өлеш керткән өчен волонтерларга рәхмәт белдергән иде. «Кешеләр моны үз тирәсендә шундый ук битараф булмаган гражданнарны берләштереп, фикердәшләрдән тулы бер командалар җыеп ихлас күңелдән һәм чын йөрәктән эшли», - дип искәртте республика җитәкчесе.

23 гыйнвардан Татарстанда РФ Саклану министрлыгы белән контракт төзүчеләргә 2,8 миллион сум акча бирелә. Акчаның күләме арту республикада түләүләр күтәрелүгә бәйле. Яңа түләү 2025 елның 1 апреленә кадәр гамәлдә булачак. Хәрбиләр махсус операция зонасында шулай ук аена 210 мең сум ала.

РФ Кораллы көчләре сафларында контракт буенча хезмәт итү, шулай ук премияләр, ташламалар һәм түләүләр турында heroes-tatarstan.ru сайтында яки 117 телефоны буенча белергә була. Шулай ук Контракт буенча хәрби хезмәткә сайлап алу пунктына (1нче разряд) мөрәҗәгать итәргә мөмкин. Адресы: Казан, Аэропорт урамы, 1/40; телефоны: (843) 221-44-52. Моннан тыш, 8 800 222 59 00 номеры буенча мөрәҗәгать итәргә була.

Материал Айгөл Яруллина катнашында әзерләнде