Яңа Чишмә районы Зирекле музеенда тәҗрибә белән уртаклаштылар

Яңа Чишмә районының Зирекле музеенда кунакларны каршы алдылар. Бу хакта «Яңа Чишмә хәбәрләре» сайтында хәбәр ителә.

«Зирекле авылы Мидхәт Газыймов исемендәге музейда хөрмәтле кунаклар - Бөтендөнья татар конгрессы Башкарма комитетының Татар төбәк тарихын өйрәнүчеләре белән эшләү комитеты җитәкчесе, Бөтендөнья татар конгрессының Милли Шура әгъзасы, Татарстан «Татар төбәк тарихын өйрәнүчеләр җәмгыяте» региональ иҗтимагый оешмасы Советы рәисе Альберт Борһанов, туган авылы Иске Кармәт турында ике китап авторы: «Иске Кармәт авылы тарихы» (2017) һәм «Өметнең чиге юк» (2018), күп кенә мәкальләр авторы, төбәкче Равил Салиев, Чистай районы төбәкчесе Әхәт Хафизов белән эшлекле очрашу булып узган.

Очрашуда Бөтендөнья татар конгрессының Яңа Чишмә район бүлеге җитәкчесе, Зирекле лицее директоры Айрат Хаметвәлиев катнашты.

Түгәрәк өстәл артында музей эшчәнлеге, үз төбәгебездә башкарылган эшләр, чаралар турында фикер алыштык. Киләчәккә планнар, эш юнәлешләре һәм аларны гамәлгә ашыру юллары билгеләнде.

Галим Альберт Әхмәтҗәнович төбәк тарихчысын, Мидхәт Гариф улын сагыну, горурлану һәм бик җылы хатирәләр белән искә алды, төбәкчеләр кат-кат рәхмәт сүзләрен җиткерделәр. Аның хезмәтенең әйтеп бетергесез зур әһәмияте хакында әйттеләр.

Альберт Әхмәтҗанович Татарстан Республикасы «Татар төбәк тарихын өйрәнүчеләр җәмгыяте» төбәк иҗтимагый оешмасы исеменнән музейга һәм аның директоры Лидия Лотфуллинага Мактау кәгазьләре тапшырды. Кунаклар исеменнән музей коллективына эшләрендә уңышлар теләп, рәхмәт сүзләре җиткерде. Ул музейга шәхси китаплар бүләк итте.

Тулырак: https://novoshishminsk.ru/news/yana-chishme/zirekle-muzeenda-tariba-belan-urtaklastylar