Пермь крае Октябрьский бистәсендә яңа мәчет ачылды

25 гыйнварда Пермь крае Октябрьский бистәсендә яңа мәчет ачылды. Мәчетне Пермь крае мөселманнары Диния нәзарәте составындагы Октябрьский бистәсе мөселманнары дини оешмасы төзегән. Бу хакта Россия мөселманнары Диния нәзарәтенең Мөфтиләр шурасы хәбәр итә.

Россия мөселманнарының дини лидеры – РФ мөселманнары Диния нәзарәте рәисе, баш мөфти шәех Равил Гайнетдин исеменнән сәламләү сүзләрен РФ мөселманнары Диния нәзарәтенең дини оешмалар белән эшләү бүлеге башлыгы Альберт Азизов җиткерде.

Мәчеттә җыелганнарны шулай ук Пермь крае мөселманнары Диния нәзарәте рәисе, баш имам-мөхтәсиб Илһам Бибарсов котлады.

Альберт Азизов Россия мөселманнары Диния нәзарәте рәисе, баш мөфти Равил Гайнетдин исеменнән яңа мәчетнең имам-хатыйбы Рәис Таһиров һәм Октябрьский бистәсе мөселманнары җирле дини оешмасы рәисе Тәнзилә Зәкринага «Дини бердәмлек өчен» медальләрен тапшырды. Октябрь районы башлыгы Георгий Полежаев мөфти Равил Гайнетдиннең Рәхмәт хаты белән билгеләп үтелде

Октябрьский бистәсе мөселманнары дини оешмасына мәчет төзү өчен җир 2004 елда бүлеп бирелгән. Ул вакытта мөселман җәмгыятен Илдус Зекрин җитәкләгән. Шул ук вакытта кечкенә генә вакытлыча гыйбадәтханә төзеп куелган. 2016 елда, Илдус Зекрин вафат булганнан соң, мөселман җәмгыятен аның әнисе Тәнзилә Зекрина җитәкләгән. Ул гыйбадәт йортын төзекләндергән. 2019 елда яңа мәчеткә нигез салынган һәм төзелеш башланган. Төзелеш эшләре 2024 елда тәмамланган, диелә хәбәрдә.