Александр Лукашенко, 86,82 процент тавыш җыеп, Беларусь Президентын сайлауда җиңде

Гамәлдәге дәүләт башлыгы Александр Лукашенко, якынча мәгълүматлар буенча 86,82 процент тавыш җыеп, Беларусь Президентын сайлауда җиңде. Белоруссия Үзәк сайлау комиссиясе рәисе Игорь Карпенко шулай дип белдерде. Бу хакта БЕЛТА агентлыгы хәбәр итә.

«Беларусь Республикасы Президентына һәр кандидат өчен сайлаучылар биргән тавышлар саны турында якынча мәгълүматлар түбәндәгечә: Гайдукевич Олег Сергеевич – 2,02 процент, Канопацкая Анна Анатольевна – 1,86 процент, Лукашенко Александр Григорьевич – 86,82 процент, Сыранков Сергей Александрович – 3,21 процент, Хижняк Александр Николаевич – 1,74 процент, барысына да каршы – 3,60 процент», - дип искәртте Беларусь Үзәк сайлау комиссиясе рәисе.

«Төп тавыш бирү көнендә барлык участокларда да вазгыять тыныч, гадәттәгечә булды. Ниндидер җинаятьләр, хокук бозу очраклары теркәлмәде. Шулай ук Үзәк сайлау комиссиясе адресына ниндидер шикаятьләр дә булмады», - дип белдерде Карпенко вазгыятькә карата үз фикерен.

Үзәк сайлау комиссиясе мәгълүматлары буенча, тавыш бирүдә сайлаучыларның барлыгы 85,70 проценты катнашкан. Теркәлгән сайлаучыларның яртысыннан артыгы катнашса, Беларусь Республикасы Президентын сайлау узган дип санала. Сайлауда җиңү өчен тавыш бирүдә катнашучыларның яртысыннан артыгының теләктәшлек күрсәтүе җитә.