Мобилизацияләнгәннәрнең хатыннарына эшкә урнашуда өстенлек бирергә тәкъдим иттеләр

Мобилизацияләнгән хәрбиләрнең хатыннарына дәүләт оешмаларына һәм хәрби частьләргә эшкә урнашканда, шулай ук штатны кыскартканда вазифаларын саклап калуга өстенлекле хокук бирү тәкъдим ителә торган закон проекты Дәүләт Думасына кертелә. Үзгәрешләр «Хәрби хезмәткәрләр статусы турында»гы законда барлыкка киләчәк.

ТАСС хәбәр иткәнчә, закон кабул ителгән очракта, мобилизацияләнгәннәрнең хатыннары һөнәри укуларга яки көндезге формада өстәмә белем алуга өстенлекле тәртиптә юллама алырга мөмкин. Уку чорына уртача хезмәт хакы сакланып кала. Бу мобилизацияләнгәннәрнең гаиләләренең тормыш дәрәҗәсен күтәрергә мөмкинлек бирәчәк.

Мондый социаль гарантияләр профессиональ хәрби хезмәткәрләрнең хатыннарына гына бирелә.