Свердловск өлкәсендә Буа театры артистлары белән очрашу булды

18 гыйнварда Свердловск өлкәсенең Татар һәм башкорт мәдәнияте үзәгендә Буа дәүләт драма театры артистлары белән очрашу булды. Артистлар театр тарихы турында сөйләде, дип хәбәр ителә Татарстан Республикасының Свердловск өлкәсендәге даими вәкиллеге сайтында.

Вәкиллекнең әйдәп баручы белгече Алинә Имадиева Буа театры артистларына рәхмәт әйтте һәм Урта Уралда татар театр сәнгатен күрсәткән өчен Татарстанның Свердловск өлкәсендәге даими вәкиллегенең Рәхмәт хатын тапшырды.

15-19 гыйнварда театр труппасы Свердловск өлкәсендә һәм Екатеринбургта гастрольдә булды. Алар Туфан Миңнуллинның «Йөрәк маем» әсәре буенча куелган «Мишәрем-шикәрем» комедиясен күрсәтте.