Зәйнең Бигеш авылы хәрбие туган авылында маскировкалау челтәрләре үрүчеләр янында булды

Махсус хәрби операциядә катнашучы Илфат Мәксәт улы ялга кайткач, хәрби зонага маскировкалау челтәрләре үрүчеләргә рәхмәт әйтергә килде. Бу хакта «Зәй яңалыклары» хәбәр итә.

Ул «Бабай» кушаматын йөртә. Узган елның май аенда Ватан сагына контракт буенча баскан. 55 яшь булуга карамастан, ил өчен катлаулы вакытта читтә кала алмый ул. Ватаныбыз иминлеге өчен каһарманнарча көрәшә, яшь буынга үрнәк булып тора. Яу кырында күрсәткән батырлыклары өчен «Махсус хәрби операциядә катнашучы» медале белән бүләкләнгән. Яңа ел алдыннан хәрби туган ягына кыска вакытлы ялга кайткан.

Бигеш мәдәният йортында маскировкалау челтәрләре үрүче хатын-кызлар бар тырышлыгын Ватаныбыз сагында торучы егетләрнең исән-сау әйләнеп кайтулары өчен куя. Һәр тасманы догалар, изге теләкләр әйтеп үрәләр.

Маскировка челтәрләре үрүчеләр авылдашлары Илфатның очрашуга килүен көтеп алды. Әлбәттә, ул клуб ишеген ачып керүгә һәрберсенең күзләре яшьләнде. Эчкерсез үзара сөйләшү булды. Апалар әзер челтәрләр эченә солдатларга дип күчтәнәчләр дә төреп җибәрә.

Хәрби ир-ат иң беренче чиратта аларга дымлы салфеткалар, эчке кием, оекбашлар кирәк булуы турында әйтте. Ул шулай ук яу кырында маскировкалау челтәрләренең бик мөһим булуын, аларны дроннардан саклавын әйтте, бу игелекле эшкә алынучыларга, гуманитар ярдәм җыючыларга рәхмәтен белдерде.

Ә челтәр үрүче хатын-кызлар, авылдашлары Илфатның, барлык хәрбиләрнең исән-сау җиңү белән әйләнеп кайтуын теләп озатып калдылар.