Кораллы көчләр белән контракт төзүче легаль булмаган мигрантлар депортацияләнми - указ

Россиядә Саклану министрлыгы белән контракт төзегән легаль булмаган чит ил кешеләрен депортацияләмәячәкләр. Ил Президенты Владимир Путин указы хокукый мәгълүмат порталында урнаштырылган.

«РФ Кораллы көчләрендә яки хәрби формированиеләрдә хәрби хезмәт узу турында контракт төзегән чит ил гражданнарына карата элек кабул ителгән депортация, реадмиссия турындагы карарлар гамәлдән чыгарыла», - диелә документта.

Әмма әлеге чара Россиянең илкүләм иминлегенә куркыныч тудыручы чит ил кешеләренә, шул исәптән конституцион төзелеш нигезләрен көч кулланып үзгәртү өчен чыгыш ясаучыларга кагылмаячак. Моннан тыш, указ шулай ук террорчылык эшчәнлегенә ярдәм итүче яки катнашучы, җәмәгать тәртибен бозарга маташучы затларга кагылмый.

Закон 2025 елның 1 гыйнварыннан үз көченә керә.