Депутат ягып җылытуга азрак түләү өчен киңәш бирде

Ягып җылытуга түләүләрдә экономияләү мөмкинлеге булсын өчен подъездларда тәрәзәләрне ябарга кирәк. Бу фикерне Дәүләт Думасы депутаты Александр Якубовский белдерде.

Аның сүзләренчә, салкын подъездлар җылыны күбрәк югалтуга китерә, димәк, ягып җылыту өчен чыгымнар да арта.

«Мондый җылылык югалтулар гаилә бюджетының ягып җылыту чыгымнарында сизелерлек чагылырга мөмкин, ягъни 10 процентка кадәр», – дип парламентарий сүзләрен китерә РИА Новости.

Татарстан Дәүләт торак инспекциясендә торак-коммуналь хезмәтләр счет-фактуралары буенча яңадан исәпләүнең дүрт сәбәбен атаганнар иде. Агымдагы елның беренче алты аенда республика халкы, гомумән алганда, 217,8 млн сумны кире кайтара алды.