Болгарда да Казандагы кебек 2025 елдан туристик салым кертергә телиләр

Болгарда да Казандагы кебек үк туристик салым кертергә телиләр. Шәһәр советының шул хактагы проекты хәзерге вакытта коррупциягә каршы экспертиза уза. Әгәр документ расланса, 2025 елның 1 гыйнварыннан салым ставкасы 1 процент тәшкил итәчәк.

Өстәвенә, ставканы ел саен арттырырга ниятлиләр. 2026 елда аны салым базасының – 2 проценты, 2027 елда – 3 проценты, 2028 елда – 4 проценты, ә 2029 елдан башлап 5 процентына кадәр күтәрәчәкләр. Болгарда туристик салымны исәпләү тәртибе РФ Салым кодексының 418.7 маддәсе нигезендә билгеләнәчәк.

Искәртеп узабыз, Казан хакимияте 2025 елдан туристик салым кертергә ниятли. Өстәвенә, сәяхәтчеләрдән 150 миллион сумнан артык акча җыярга өметләнәләр. Отельерлар моңа шатланмый, чөнки аларга «туристлардан ясак» җыю һәм документлар алып бару вазифасы йөкләнәчәк.