«Татар кызы Мордовия – 2024» бәйгесендә катнашучылар белемнәрен күрсәтте

6 ноябрьдә Рухи-мәдәни үзәктә «Татар кызы Мордовия – 2024» бәйгесенең интеллектуаль этабы узды. Сайлап алу турыннан аңа 9 кыз узды. Кызларга 17-24 яшь. Бу хакта Бөтендөнья татар конгрессы сайтында хәбәр ителә.

Интеллектуаль этапта бәйгедә катнашучылар сорауларга җавап биргән. 20 биремнән торган тестта татар киеме, татар әдәбияты, татар теле һәм язуы үзенчәлекләре, дөньяга танылган татарлар, татар бәйрәмнәре, Мордовиянең татар авыллары, татар халкы тарихы турында берничә блок булган.

Мәсәлән, татар хатын-кызлары костюмы турында сорауларга дөрес җавап бирү өчен кызларга аның хәситә, итәк һәм калфак кебек өлешләре турында белергә кирәк булган. Шулай ук алар татар ашлары, аларның составы (зур бәлеш, кыстыбый, пәрәмәч, чәкчәк) турында белемнәрен күрсәткән.

Бәйгене оештыручылар әйтүенчә, авыл мәктәпләрендә белем алган кызларга сынауны узу җиңелрәк булган. Алар анда туган телне дә, татар әдәбиятын да, шулай ук төп тарихи вакыйгаларны да өйрәнгән.