Казанда Вознесение трактын федераль акчага төзеп бетерергә ниятлиләр

Татарстан башкаласында Вознесение трактының икенче этабында төзелеш эшләрен тәмамлау өчен федераль бюджеттан өстәмә финанслар кирәк. ТР транспорт һәм юл хуҗалыгы министры урынбасары Артем Чукин «Татар-информ» агентлыгында узган матбугат конференциясендә шулай дип белдерде.

«Без федераль үзәктән финанслауны көтәбез. Бу нинди күләмдә һәм кайчан булыр – анысын әйтә алмыйм. Вознесение тракты ачылуны ике шарт ачык билгеләячәк – бу ноябрь яки декабрь булачак», - дип белдерде ТР Транспорт һәм юл хуҗалыгы министрлыгы вәкиле.

Чукин билгеләп үткәнчә, төзелеш эшләрен тәмамлау өчен концессион килешү төзергә ниятлиләр.

«Концессион тәкъдим дәүләт сатып алулары рәсми сайтында урнаштырылган. Әгәр конкурс буенча башка катнашучылар булса, ул чагында концессион килешүне гамәлгә ашыру вакыты бераз алга күчәчәк. Шуңа күрә агымдагы елда даталарны төгәл атамас идем. Икенчедән, бүген финанслауның кирәклеген нигезләү юнәлешендә эш алып барыла. Әгәр федераль бюджеттан өстәмә финанслар бүлеп бирелсә, бу да срокларга йогынты ясаячак», - дип искәртте ул.

Вознесение трактының икенче этабының озынлыгы 8 километр тәшкил итә, ул Җиңү проспектыннан М7 «Волга» трассасына кадәр сузыла. Юл түләүле булачак.

Вознесение трактының беренче этабы (Гвардия урамыннан Җиңү проспектына кадәр) буенча машиналар хәрәкәте 2023 елда ачылды. Әлеге участокның озынлыгы – 4 километрга якын.