Лавров: Казандагы саммит БРИКСның абруе тиз артуны күрсәтте

Казанда узган БРИКС саммиты берләшмәнең абруе тиз артуны күрсәтте. Бу хакта РФ тышкы эшләр министры Сергей Лавров TV BRICS халыкара челтәренә биргән интервьюда белдерде.

«Саммит БРИКСның абруе тиз артуны һәм аның эшенә бик күп илләр кушылырга омтылуны күрсәтте», - дип ассызыклады дипломат.

Моннан тыш, Россия Тышкы эшләр министрлыгы башлыгы БРИКС партнер-илләре категориясен булдыру турында искәртте. Аның сүзләренчә, ул төркемнең «яңа тулы хокуклы һәм элекке» катнашучылары быел киңәйтелгәннән соң бер-берсе белән эшләп китә алсын өчен кирәк булды.

«<...> кайбер илләр берләшмәнең тулы хокуклы әгъзасы булырга тели. Бу мәсьәлә киләсе ел дәвамында каралачак. Күпләр БРИКС чараларында гына катнашырга тели. Андыйлар утыздан артык», - дип аңлатты ул.

Лавров сүзләреннән аңлашылганча, БРИКСта катнашучы дәүләтләр «чакыру юлланган илдән җавап килү белән, әлеге дәүләт БРИКСка партнер-ил буларак кушылу турында игълан ителәчәк», дип килешкән.

Моннан тыш, дипломат билгеләп үткәнчә, БРИКС илләре Казан декларациясен басым ясау омтылышларыннан башка гына, мәнфәгатьләр балансы нигезендә килештерүгә ирешә алганнар. «Бер-беребезгә ярашлы формулировкалар эзләдек. Алар барлык мәсьәләләр буенча да табылды», - дип ышандырды ул.