Дәүләт Думасы депутаты Вольфсон Казанда торак арендалау бәясе арту сәбәпләрен атады

Казанда торак арендалау бәясе арту беренчел һәм икенчел күчемсез милек базары уртача керемле гаиләләр өчен кыйммәт булу нәтиҗәсе. «Татар-информ»га мондый фикерне Дәүләт Думасы Төзелеш һәм торак-коммуналь хуҗалык комитеты әгъзасы, Татарстаннан депутат Илья Вольфсон белдерде.

Элегрәк хәбәр ителгәнчә, Казан торак арендалау бәясе арту буенча шәһәрләр өчлегенә керде. ТР башкаласы әлеге күрсәткеч буенча Красноярск һәм Ростов-на-Донудан гына түбәнрәк урын яулады, шул ук вакытта Мәскәүне узып китте. РБК мәгълүматларына караганда, Казанда торак арендалау бәясе 45,9 процентка арткан. Фатир арендалап тору бәясе аена уртача 50 мең сумны тәшкил итә.

«Төп ставка арту, ташламалы программалар гамәлдән чыгарылу, дәүләт ярдәме программалары буенча лимитлар кытлыгы — барысы бергә болар фатир сатып алуны кичектерергә, уңайлырак шартлар булганны көтәргә мәҗбүр итә. Кешеләр фатир арендаларга керешә, ихтыяҗ арта — бәяләр күтәрелә. Бөтен ил буйлап шундый тенденция күрәбез», - диде Вольфсон.

Аның сүзләренчә, Казанда базар механизмнары тагын да ныграк катлаулана, чөнки Татарстан Республикасы башкаласы «кешеләрне җәлеп итүче магнит булып кала бирә».

«Берничә көнгә туристлар да килә, башка шәһәрләрдән һәм төбәкләрдән бөтенләйгә күченеп килүчеләр дә бар. Туристлар агымы, әлбәттә, һәрвакыт күләмлерәк булачак. Шуңа күрә уртача бәягә озак һәм кыска вакытка арендалап тору арасындагы нисбәт кыска вакытка арендалау файдасына авышу йогынты ясый. Быел БРИКС өстәмә импульс булды. Аның йогынтысы якын киләчәктә дә сизеләчәк әле», - дип өстәде депутат.

Бу өлкәне тыюлар яки чикләүләр ярдәмендә җайларга ярамый, чөнки бу тискәре нәтиҗәләргә китерергә мөмкин, дип саный Вольфсон.

«Нәрсәне дә булса тыя яки штраф сала башласак, тәкъдим кимүгә генә ирешәчәкбез. Шуңа күрә без арендага бирелә торган йортлар базары үсешен стимуллаштыручы механизмнар булдыруга юнәлеш тотабыз», - дип йомгаклады парламентарий.