Ассанжның әтисе Казанны һәм татар мәдәниятен югары бәяләде

WikiLeaks оешмасына нигез салган Джулиан Ассанжның әтисе, БРИКС саммитында катнашкан Джон Шиптон Казанны һәм татар мәдәниятен югары бәяләде.

«Миңа Казанга оештырылган сәфәр бик тә ошады. Татарстан һәм татар мәдәнияте белән бераз гына танышуым да гаҗәпләнүемә каршы яхшы һәм рәхәт булды», - диде Шиптон РИА Новости агентлыгына биргән интервьюсында.

Ул Казан аны якты чырай белән каршы алуын искәртте.

«Сәяхәт итүче кешеләр арасында кунакчыллык – изге әйбер. Миңа ул Татарстанда да, Россия Федерациясендә дә күрсәтелде. Үзенең бөтен тулылыгы, бөтен тылсымы белән, чөнки бу – кеше холкындагы бер элемент», - диде спикер.

БРИКС саммиты Казанда 22-24 октябрьдә узды. Анда 30дан артык дәүләтнең делегацияләре катнашты, 20дән артык ил иң югары дәрәҗәдә тәкъдим ителде.

Элегрәк Иран журналисты Хаял Муаззин Казанда узган БРИКС саммитын тарихи вакыйга дип атаган иде.