Чайлдфрины пропагандалаган өчен штраф турында закон проекты хупланды

Дәүләт Думасының Мәгълүмати сәясәт комитеты чайлдфри идеологиясен пропагандалау турындагы тыюны бозган өчен административ җәза каралган закон проектын хуплады. Бу хакта РИА Новости хәбәр итә.

Документ нигезендә, тыюны бозган өчен административ җаваплылык кертү карала. Аерым алганда, гражданнарга – 50 меңнән 100 мең сумга кадәр, вазифаи затларга – 100 меңнән 200 мең сумга кадәр, юридик затларга 800 меңнән 1 млн сумга кадәр штраф салырга тәкъдим ителә.

Бу тыюны массакүләм мәгълүмат чаралары яки Интернет кулланып бозган очракта гражданнар 100 меңнән 200 мең сумга кадәр, вазифаи затлар 200 меңнән 400 мең сумга кадәр, юридик затлар 1 млн сумнан 4 млн сумга кадәр штрафка тартылырга мөмкин.

Әгәр чайлдфри пропагандасы балигъ булмаганнар арасында алып барылса, гражданнардан 100 меңнән 200 мең сумга кадәр, вазифаи затлардан 200 меңнән 400 мең сумга кадәр, юридик затлардан 1 млн сумнан 2 млн сумга кадәр штраф түләтергә мөмкиннәр.

Әгәр дә шундый ук гамәлләр массакүләм мәгълүмат чаралары яки интернет җәлеп итеп башкарылган булса, штрафлар арта: гражданнар өчен – 200 меңнән 400 мең сумга кадәр, вазифаи затлар өчен – 400 меңнән 800 мең сумга кадәр, юридик затлар өчен – 2 млн сумнан 5 млн сумга кадәр.