Иминият пенсияләре гыйнвардан 7,3 процентка артачак

Россиядә иминият пенсияләре 1 гыйнвардан 7,3 процентка артачак. Индексация эшләүчеләргә дә, шулай ук эшләмәүчеләргә дә кагыла. Бу хакта Дәүләт Думасы депутаты Светлана Бессараб «Лента.ру»да әңгәмә вакытында сөйләгән.

Аның сүзләренчә, 2025 елга Россия бюджеты социаль өлкәләргә юнәлдерелгән, санкцияләргә карамастан, гражданнарның социаль гарантияләре һәм ташламалары үсүен дәвам итә.

Бессараб искәрткәнчә, 2025 елда балалы гаиләләр өчен барлык социаль гарантияләр һәм ташламалар, шулай ук башка түләүләр күләме артачак. Ә социаль пенсияләрне апрельдә 14,73 процентка арттырачаклар.