Васил Шәйхразиев Ростов өлкәсенең татар мәдәни үзәгендә булды

Татарстан Премьер-министры урынбасары, Бөтендөнья татар конгрессының Милли шура рәисе Васил Шәйхразиев эш сәфәре белән Ростов өлкәсенә килде. Бу хакта Бөтендөнья татар конгрессы сайты хәбәр итә

Монда аны Ростов өлкәсенең төбәк сәясәте һәм массакүләм коммуникацияләр министры Владимир Островский, өлкәнең «Якташлар» Татар-башкорт мәдәни үзәге иҗтимагый оешмасы рәисе Надия Курмакаева, шулай ук Бөтендөнья татар конгрессының Милли Шура әгъзасы Марсель Бәдгетдинов каршылады.

Эш сәфәре кысаларында Васил Шәйхразиев татар мәдәни үзәгендә дә булды.

Ул очрашуда катнашучыларны сәламләде һәм үзенең эш сәфәре программасы белән таныштырды. Шулай ук ул Бөтендөнья татар конгрессы проектлары турында да сөйләде. Ростов өлкәсе мөселманнары Диния нәзарәте рәисе имам-ахун Мөхәммәт хәзрәт Бикмаевка да сүз бирелде.

Татар мәдәни үзәге вәкилләре Татарстан делегациясенә килгән өчен рәхмәт белдерде, татарлар активы белән уртак эш турында сөйләделәр. Алар Ростовта Көньяк Сабантуйны бергәләп үткәрүләрен һәм аның алга таба багланышларга өстәмә стимул бирүен телгә алдылар, шулай ук татар үзәге эшенең мөһим мәсьәләләрен күтәрделәр.

Ростов өлкәсенең Татар мәдәни үзәген ачу тантанасы 2002 елда булды. 2019 елда Ростов өлкәсе губернаторы Василий Голубев һәм Татарстан Республикасы Рәисе Рөстәм Миңнехановның рәсми очрашуы вакытында яңа бинаны оештыру турында карар кабул ителде.