Казан мэры БРИКС бонуслары турында: Кунаклар китәчәк, ә яңа инфраструктура калачак

Киләсе айда Казан зур халыкара вакыйга — БРИКС саммитын кабул итәчәк. Бу темага Татарстан Рәисе Рөстәм Миңнехановның республика Дәүләт Советына Юлламасында зур игътибар бирелде. Казан мэры Илсур Метшин журналистларга Татарстан башкаласының киңкүләмле чарага ничек әзерләнүен шәрехләде.

«Без федераль хөкүмәт, Росконгресстан партнерларыбыз белән бик зур эш башкардык. Әлбәттә, республика Хөкүмәтендә дә бу эштә катнашмаган кеше юк. Казан белән Татарстанның халыкара чаралар уздыруда зур тәҗрибәсе булуга карамастан, без әле мондый пландагы вакыйганы үткәрмәдек. Бу барыбер сәяси саммит», - дип ассызыклады шәһәр җитәкчесе.

Илсур Метшин билгеләп үткәнчә, БРИКС саммитын уздыру көннәрендә Казан 30дан артык дәүләт делегациясе башлыгын, 5 халыкара Бөтендөнья оешмасын кабул итәчәк, шуңа күрә әзерлек бик җитди дәрәҗәдә алып барыла.

«Мин һәрвакыт әйтәм, без моның белән беркайчан да шөгыльләнмәгән кебек эшләргә кирәк. Ул вакытта барлык җитешсезлекләр дә юкка чыгарылачак», - дип уртаклашты мэр.

Шул ук вакытта БРИКСка әзерлек нәтиҗәсендә республика башкаласы бөтенләй башка дәрәҗәдә шәһәр инфраструктурасына өстәмә плюс алачак.

«Бу йортларның фасадлары да, коммуникация челтәрләре дә, юллар, парклар, скверлар төзү дә, яктырту да. Безнең кунакханә инфраструктурасы да яңартылачак. Кунаклар китәчәк, һәм болар барысы да безнең халыкка һәм башкаланың яңа кунакларына калачак», - дип йомгаклады Илсур Метшин.

Бүген Татарстан Рәисе Рөстәм Миңнеханов Салих Сәйдәшев исемендәге Дәүләт Зур концертлар залында парламентка традицион Юллама белән чыгыш ясады. Утырышка депутатлардан тыш дәүләт һәм муниципаль хакимият органнары вәкилләре, предприятие, учреждение җитәкчеләре һәм башка бик күпләр – барлыгы 670 кеше чакырылган иде.