Мөхәммәтшин депутатларга Миңнеханов Юлламасы бурычлары буенча тәкъдимнәр әзерләргә кушты

Депутатларга Татарстан Рәисе Рөстәм Миңнехановның ТР Дәүләт Советына Юлламасында куйган бурычларны хәл итү буенча тәкъдимнәр әзерләргә кирәк. Бу хакта ТР Дәүләт Советы Рәисе Фәрит Мөхәммәтшин VII чакырылыш республика парламентының өченче утырышында белдерде.

«Республика Рәисе Юлламасын барлык комитетларда да анализларга кирәк. Без комитет рәисләреннән сорарбыз. Бу өлештә Хөкүмәт белән үзара бәйләнештә эшләячәкбез. Безнең бурыч - ул әйткән проблемаларны закон нигезендә хәл итү», - диде парламент җитәкчесе.

Мөхәммәтшин фикеренчә, Юлламаны укыганда Дәүләт Советының яңа депутатлары булуы аеруча мөһим. «Мин сездән бу процесска тизрәк керүегезне, процедураларга төшенүегезне һәм сез расланган комитетларда актив эшләвегезне сорыйм», - дип мөрәҗәгать итте ул парламентарийларга.