Гатчина хастаханәсендә төрле дин тотучылар өчен гыйбадәт бүлмәсе барлыкка киләчәк

Россия мөселманнары Диния нәзарәте рәисенең Төньяк-Көнбатыш федераль округындагы Тулы вәкаләтле вәкиле, Санкт-Петербург һәм Ленинград өлкәсе мөселманнары Диния нәзарәте рәисе имам-мөхтәсибе Дамир Хөсәенов һәм имам Артур Нигъмәтуллин Гатчина районара клиник хастаханәсендә булды, анда алар баш табиб вазифасын башкаручы Ростислав Павлов белән очрашты. Бу хакта Россия Мөфтиләр җыены матбугат хезмәте хәбәр итә.

Дамир хәзрәт медицина учреждение җитәкчесенә РФ мөселманнары Диния нәзарәте һәм Россия Мөфтиләр шурасы рәисе мөфти шәех Равил Гайнетдин исеменнән сәламләү сүзләрен җиткерде һәм Санкт-Петербург белән Ленинград өлкәсе мөселманнары Диния нәзарәте эшчәнлеге турында сөйләде, анда социаль хезмәткә, гуманитар һәм хәйрия проектларына аерым игътибар бирелә.

Очрашуда алар үзара бәйләнеш векторлары турында фикер алышты, пациентларга ярдәм итүне төп максат итеп куйдылар. Бу контекстта хастаханә диварларында төрле дин кешеләре өчен гыйбадәт бүлмәсе булдыру турында килешүгә ирешелде. Әлеге инициативаның мөһимлеген ассызыклап, Дамир Хөсәенов билгеләп үткәнчә, дингә ышанган кешеләр медицина ярдәме белән рухи ярдәмгә дә мохтаҗ. Шул ук вакытта ул Артур Нигъмәтуллин белән даими рәвештә Гатчина, шулай ук Вырица, Сиверск хастаханәләрендә булачагын һәм пациентлар белән рухи әңгәмәләр алып барачагын өстәде.

Үз чиратында Ростислав Павлов мөселманнарга конструктив хезмәттәшлек һәм ярдәм күрсәтергә әзер булулары өчен рәхмәт белдерде.

«Без пациентларга рухи ярдәм күрсәтү өчен төрле конфессияләр вәкилләре белән хезмәттәшлекне дәвам итәбез. Мөселманнар безгә бу эштә ярдәм итәргә һәм уртак проектларда катнашырга әзер. Без аралаштык, үзара хезмәттәшлекнең мөмкин булган юллары һәм планнары турында фикер алыштык», – дип китерә баш табиб вазифаларын башкаручының сүзләрен хастаханәнең матбугат хезмәте.