Minecraft уенында БРИКС шәһәрләрен төзү буенча турнир җиңүчесе билгеле
Казанда «Миллиард.Татар» басмасы редакциясе оештырган «Таткрафт» кубогына «Татарстан БРИКС шәһәрләрен төзи» Minecraft уены буенча турнирга нәтиҗә ясадылар. Конкурста Татарстан башкаласында яшәүче, узган «Таткрафт» турнирларында призлы урыннар яулаган Артем Горюнов җиңде. Бу хакта «Миллиард.Татар» басмасы хәбәр итә.
Горюнов шулай ук чараның иганәчесе — «Татнефть-Мирас» коммерцияле булмаган автоном оешмасыннан уенда Казан аэропортын төзү өчен махсус приз алды.
Турнир инде өченче ел Minecraft дөньяның иң яхшы төзүчеләре командаларын берләштерә. Бу юлы анда 20дән артык илдән 38 кеше катнашты. Алар – Бразилия, Төркия, Мисыр, Сингапур, Кытай, Чили, Сербия, Аргентина, Беларусь, Һиндстан һәм башкалар. Конкурста барлыгы 200дән артык кеше катнашты.
Турнир нәтиҗәләренә багышланган матбугат конференциясе «Татмедиа» АҖендә узды. Анда «Татар-информ» мәгълүмат агентлыгы баш мөхәррире — «Татмедиа» АҖ генераль директоры урынбасары Ринат Билалов, «Татнефть-Мирас» тарихи һәм мәдәни мирасны саклауга ярдәм итү үзәге» коммерцияле булмаган автоном оешма директоры Аделина Павлова, Казан федераль университетының Халыкара мөнәсәбәтләр, тарих һәм көнчыгышны өйрәнү институты директоры вазифаларын вакытлыча башкаручы Раил Фәхретдинов, «Миллиард.Татар» проектында катнашучы һәм модератор Илгизәр Вахитов катнашты.
«Ярыш кысаларында киң иҗади якын килү күрсәтелде һәм гаять зур эш башкарылды, мондый конкурслар киләчәктә дә кирәк була. Казан рәсми булмаган дипломатик башкалага әверелә. Без халыкара процессларга бик нык җәлеп ителгән, биредә күпсанлы дипломатик миссияләр бар, шуңа күрә халыкара тематика киләчәктә дә иҗади конкурслар өчен актуаль булачак», — дип белдерде Ринат Билалов.
- БРИКСның уналтынчы саммиты Татарстан башкаласында 22-24 октябрьдә уза. Татарстан Рәисе Рөстәм Миңнеханов билгеләп үткәнчә, мондый дәрәҗәдәге вакыйганы үткәрү – республика өчен зур мәртәбә һәм җаваплылык. ТР башкаласы мэры Илсур Метшин ул көннәрдә шәһәрнең 20 меңгә якын кунакны кабул итәчәген әйтте.