Миңнеханов «Динамо-Ак Барс» волейбол командасын Россия Суперкубогында җиңүе белән котлады

Татарстан Рәисе Рөстәм Миңнеханов «Динамо - Ак Барс» хатын-кызлар волейбол клубын Суперкубок өчен уенда «искиткеч триумф белән» котлады.

Республика җитәкчесе ТР Дәүләт Советы Рәисе, ТР Волейбол федерациясе президенты Фәрит Мөхәммәтшин, ТР Президенты Аппараты җитәкчесе, «Динамо» физик культура һәм спорт җәмгыяте рәисе Әсгать Сәфәров, «Динамо-Ак Барс» хатын-кызлар волейбол командасы президенты Леонид Барышев, команданың баш тренеры Зоран Терзичка, шулай ук команда әгъзаларына котлау телеграммасы җибәрде.

«Сезне танылган совет волейболчысы Александра Чудина исемендәге Россия Суперкубогы уенында искиткеч триумф белән котлыйм. Бу җиңү аеруча кыйммәткә ия - сез танылган фаворитны җиңә һәм аның белән дәрәҗәле матч трофейлары саны буенча тигезләшә алдыгыз, алар сездә өчәү булды. Сез ышандырырлык итеп, динамоларча көрәштегез, искиткеч бердәмлек күрсәттегез, чираттагы тапкыр Татарстан волейбол мәктәбенең югары дәрәҗәдәге осталыгын расладыгыз», - дип язган Миңнеханов котлау телеграммасында.

Ул шулай ук командага матур һәм лаеклы чыгышлары, кичергән шатлык мизгелләре, клубның уңышлары белән чын-чынлап горурлану мөмкинлеге өчен рәхмәт белдерде.

«Барыгызга да чын күңелдән яңа һөнәри казанышлар, үз көчегезгә ышаныч һәм, әлбәттә инде, спортта уңышлар телим», - дип язган Татарстан Рәисе.