Новокузнецк шәһәрендә «Чулпан» мәчетенең 20 еллыгын бәйрәм итәләр

Новокузнецк шәһәрендә «Чулпан» мәчетенең 20 еллыгына багышланган тантаналы чара узды. Бу хакта Россия мөселманнары Дини җыены Үзәкләштерелгән дини оешмасының матбугат хезмәте хәбәр итә.

Чарада Кузбасс мөфтие Таһир хәзрәт Бикчәнтәев, шәһәр башлыгы урынбасары Сергей Полев, иҗтимагый мөнәсәбәтләр бүлеге башлыгы Оксана Петрова, шулай ук Кузбасс мәчетләренең имамнары һәм рәисләре, «Чулпан»га йөрүче мөселманнар һәм мәчетнең активистлары катнашкан.

Бәйрәм Коръән уку һәм Мөхәммәд пәйгамбәргә (салләллаһу галәйһи вә сәлләм) салават әйтүдән башланган. Коръәнне мәчетнең якшәмбе курслары укучылары укыган.

Кереш сүз белән мәчетнең имам-хатыйбы Әнвәр хәзрәт Аширов чыгыш ясаган, ул мәчетнең тарихы турында сөйләгән.

Кузбасс мөфтие Таһир хәзрәт Бикчәнтәев исә үзенең чыгышында мәчетнең яшьләрне тәрбияләүгә һәм мәдәни һәм дини традицияләрне популярлаштыруга керткән зур өлешен ассызыклаган. Ул билгеләп үткәнчә, «Чулпан» мәчете мөселманнарның бик күп буыннарын җәлеп итү үзәгенә әверелә, аларга белемгә омтылуда теләктәшлек күрсәтә.

Шәһәр башлыгы урынбасары Сергей Полев Новокузнецкида конфессияара татулык һәм мәдәни алмашуның мөһимлеген ассызыклаган. «Чулпан» мәчете әлеге кыйммәтләрне саклауда төп роль уйный, дип билгеләп үткән. Ул шулай ук дини һәм социаль үсеш өлкәсендә актив эшчәнлеге өчен мәчет җитәкчелегенә рәхмәт белдергән.

Чара мәчет активистлары һәм эшлеклеләрен бүләкләү белән дәвам итте. Аларга мәчетнең үсеше һәм чәчәк атуына зур өлеш керткән өчен рәхмәт грамоталары тапшырылды. Шулай ук барлык катнашучылар өчен бәйрәм төшке ашы оештырылды. Чара өйлә намазын уку һәм Кузбасс шәһәре һәм бөек Туган илебезнең чәчәк атуын, тыныч һәм имин булуын сорап күмәк дога кылу белән тәмамланды, диелә хәбәрдә.