Сербия вице-премьеры Казанда БРИКС саммитында катнашачак

Сербия вице-премьеры Александр Вулин октябрьдә БРИКС саммитында катнашу өчен Казанга килергә планлаштыра. Ул моны РИА Новости белән әңгәмә вакытында раслаган.

«Мин киләм», — дип хәбәр иткән агентлык әңгәмәдәше.

Вулин 4 сентябрьдә «Көнчыгыш икътисади форумы 2024» кысаларында Россия Президенты Владимир Путин белән очрашты. Әңгәмә барышында Россия дәүләте башлыгы Сербия президенты Александр Вучичның берләшмә саммитында катнашачагына өметләнүен белдерде.

Соңрак Сербия лидеры чакыруны алуы, әмма килү-килмәве турында соңрак хәбәр итәчәген ассызыклады.

Искәртик, саммит 22-24 октябрьдә узачак. Бу көннәрдә Татарстан башкаласында 20 меңгә якын кунак көтелә.