Песков: Кремль Казандагы саммитта Путин белән Эрдоганның сөйләшә алуына исәп тота

Россия хакимияте Казанда БРИКС саммитында РФ Президенты Владимир Путинның аның Төркия коллегасы Рәҗәп Тайип Эрдоган белән сөйләшүләре булыр дип өметләнә. Бу хакта брифингта журналистларга Кремль вәкиле Дмитрий Песков сөйләде. Бу хакта РИА Новости яза.

«Без Казанда БРИКС саммитында ике Президентның сөйләшә алуына өметләнәбез, ике дәүләт башлыгына мондый мөмкинлек бирелер дип өметләнәбез», – диде Россия лидерының матбугат сәркатибе, Путин һәм Эрдоган ел ахырына кадәр сөйләшә алырмы дигән сорауга җавап биреп.

Элегрәк Haber Global телеканалы чыганаклары Эрдоган Казанда БРИКС саммитында булачак дип хәбәр иткән иде. Моңа кадәр Төркия хакимиятенең бу оешмага керү өчен рәсми гариза биргәнлеге билгеле булды.

БРИКСның 16нчы саммиты Татарстан башкаласында 22-24 октябрьдә уза. Татарстан Рәисе Рөстәм Миңнеханов белдергәнчә, мондый дәрәҗәдәге вакыйганы үткәрү – республика өчен зур мәртәбә һәм җаваплылык. Татарстан башкаласы мэры Илсур Метшин ул көннәрдә шәһәрнең 20 меңгә якын кунакны кабул итәчәген әйтте.