Кондратьев Татарстан халкының Дәүләт Советына сайлау турындагы сорауларына җавап бирәчәк

Татарстан Үзәк сайлау комиссиясе рәисе Андрей Кондратьев иртәгә, 7 сентябрьдә, Татарстан Республикасы интернет-бергәлегенең туры эфирында социаль челтәрләрдән файдаланучыларның сорауларына җавап бирәчәк.

Эфирның темасы VII чакырылыш ТР Дәүләт Советына депутатлар сайлау булачак. Сүз, аерым алганда, республиканың сайлау системасы Татарстан парламентына сайлауга әзерме, кандидатлар арасында конкуренция нинди, тавыш бирүнең ачыклыгы һәм легитимлыгы ничек тәэмин ителәчәге турында барачак.

Онлайн-эфирны шимбә көнне «ВКонтакте» һәм «Одноклассники» социаль челтәрләрендә карарга мөмкин, трансляция 10.00 сәгатьтә башлана.

Татарстан VII чакырылыш Дәүләт Советына депутатлар сайлау 8 сентябрьдә уза. 50 депутат партия исемлекләре буенча һәм шул кадәр үк — бермандатлы округлар буенча сайлыйлар.

Татарстан Үзәк сайлау комиссиясе «Яңа кешеләр», «ЛДПР - Россия Либераль-демократик партия», «Гадел Россия — Патриотлар — Дөреслек өчен» «Бердәм Россия», «КПРФ – Россия Коммунистик партиясе» сәяси партияләре исемлеген теркәде.

100 депутат мандатына 397 кандидат дәгъва итә.