Дәүләт Советына сайлаулар алдыннан тавыш бирүчеләрнең өйләренә килә
29 августтан Татарстанда ТР Дәүләт Советына сайлауларда тавыш бирү турында мәгълүмат җиткерү өчен сайлаучыларның өйләре буйлап йөрү башлана. Бу хакта республика Үзәк сайлау комиссиясе хәбәр итә.
«Тавыш бирүгә әзерлек – бик җаваплы, системалы процесс, ә сайлаулар турында мәгълүмат җиткерү – бу эшнең мөһим өлеше», - дип белдерде ТР Үзәк сайлау комиссиясе рәисе Андрей Кондратьев.
Аның сүзләренчә, участок сайлау комиссияләре әгъзалары Татарстан халкына үз сайлау участогыңны табу, өйдән тавыш бирү мөмкинлеге турында һәм «Мобиль сайлаучы» системасы аша тавыш бирү турында гаризаны кайсы көнгә кадәр тапшырырга кирәклеге турында сөйләячәк.
«Казан, Чаллы, Түбән Кама, Әлмәт һәм Яшел Үзәннең иң күп кеше йөри торган урыннарында, сәүдә үзәкләре янында, парк һәм скверларда, предприятиеләргә керү урыннарында, без сайлаулар турында мәгълүмати материаллар өләшәбез, тавыш бирү формалары һәм вакыты турында сөйлибез, гражданнарның тәкъдимнәрен һәм шелтәләрен туплыйбыз», — дип өстәде ТР Үзәк сайлау комиссиясе рәисе урынбасары Андрей Нефедов.
Татарстан Дәүләт Советы депутатларын сайлаулар 8 сентябрьдә уза. 50 депутат – партия исемлекләре, тагын 50се бермандатлы сайлау округлары буенча сайланачак.
Үзәк сайлау комиссиясе биш сәяси партиянең исемлекләрен теркәде: «Яңа кешеләр», «ЛДПР – Россия либераль-демократик партиясе», «Гадел Россия – Патриотлар – Дөреслек өчен», «Бердәм Россия», «КПРФ – Россия Федерациясе Коммунистлар партиясе».
100 депутат мандатына барлыгы 397 кандидат дәгъва кыла.