Россиядә ташламалы ипотеканың дүрт программасын булдыруны караячаклар

Киләчәктә Россиядә 4 яңа ташламалы ипотека программасы булырга мөмкин. Алар яшь белгечләргә, шулай ук сәнәгать, төзелеш һәм фән хезмәткәрләренә биреләчәк. Бу хакта «Парламент газетасы» Дәүләт Думасының Финанс базары буенча комитеты рәисе Анатолий Аксаковка сылтама белән хәбәр итә.

«Минем уйлавымча, киләсе сессиядә үк без берьюлы берничә яңа программа турында фикер алыша башлаячакбыз, алар, бер яктан, гражданнар өчен торак сатып алуны гадиләштерә, ә икенче яктан — дәүләткә критик мөһим өлкәләрдә үз мөмкинлекләрен һәм ресурсларын үстерергә мөмкинлек бирә», — дип белдерде агентлык әңгәмәдәше.

Депутат билгеләп үткәнчә, сәнәгать хезмәткәрләре өчен программа ихтыяҗ булган белгечләрне ташламалы шартларда торак мәйданы белән тәэмин итәргә мөмкинлек бирәчәк. Төзелеш өлкәсендә ипотека киңкүләмле төзелешләр планлаштырылган төбәкләрдә яшәүчеләр өчен билгеләнә.

Аксаков сүзләренчә, илдә тәмамланган ташламалы ипотека программасы урынына ярдәмнең яңа өстәмә чаралары барлыкка килергә тиеш.

«Бу юлы аларны тәртипкә салынган һәм төгәл регламентланган итү бурычы тора, бу торак базарында контрольсез ихтыяҗ тудырып, барысы да рәттән файдалана алмасын өчен эшләнә», — дип ышана ул.