Татарстанның иң яхшы укытучылары эшли торган мәктәп директорларына түләү бирәләр

Татарстанның кайбер мәктәп җитәкчеләре 30 мең сум күләмендә бер тапкыр акча алачак. Биредә сүз 2023 елда педагогик эшчәнлектәге казанышлары өчен республиканың иң яхшы укытучыларына премияләр тапшыру бәйгесендә җиңүчеләр эшли торган белем бирү учреждениеләре хакында бара.

ТР Хөкүмәте карарын Татарстан Премьер-министры вазифаларын башкаручы Рөстәм Нигъмәтуллин имзалаган.

Билгеләп үтелгәнчә, әлеге акча «мәгариф лидерларына ярдәм күрсәтү, алдынгы идарә итү һәм педагогик тәҗрибәне тарату, белем бирүнең сыйфатын һәм педагогларның хезмәт хакын арттыру өчен» бирелә.

ТР Мәгариф һәм фән министрлыгына 60 көн эчендә түләүне бирү тәртибен эшләргә һәм расларга кушылган.