سهېل اپرېدی: چارواکو د کورنۍ له خبرولو پرته عمران خان روغتون ته لېږدولی
د خیبر پښتونخوا اعلاوزیر سهېل اپرېدی وايي، د راولپېنډۍ اډیالې زندان چارواکو تېره میاشت د تحریک انصاف بنسټګر او پخوانی وزیراعظم عمران خان تر هغې وروسته روغتون ته ولېږداوه چې د هغه د سترګو دید خورا کم شو. نوموړي د فبرورۍ پر ۱۲مه په اسلام اباد کې د خبري غونډې پر مهال د مشال راډيو د پوښتنې په ځواب کې وویل چې د زندان انتظامیې د خان شخصي ډاکتران او کورنۍ نه وه خبره کړې. د اډیالې زندان انتظامیې لا د اپرېدي د دې تور په غبرګون کې څه نه دي ویلي. اپرېدي د بلې پوښتنې په ځواب کې وویل چې که موقع برابره شي نو د طالبانو له حکومت سره د خبرو لپاره افغانستان ته جرګې استولو ته تیار دی. موږ له نوموړي څخه په پیل کې د خان د روغتیا او بیا د تیرا د بې کوره شویو د وضعیت په اړه پوښتلي دي. د ځواب لپاره ویډیو وګورئ.