د اوکرایین په اړه تر سرمشریزې مخکې بریټانیا له دغه هېواده ملاتړ ښوولی
د بریټانیا صدراعظم کایر سټارمر ویلي هېواد یې د اوکرایین دوامداره ملاتړ ته متعهد دی.ښاغلي سټارمر شنبه ماښام د اوکرایین له ولسمشر ولودومیر زیلنسکي سره لیدلي.تمه ده چې د یکشنبې په ورځ په لندن کې د اوکرایین په اړه د اروپايي هېوادونو سرمشریزه جوړه شي.زیلینسکي یوه ورځ وروسته له هغه بریټانیا ته تللی چې د امریکا له ولسمشر ډونالډ ټرمپ سره یې په سپینه ماڼۍ کې د لیدنې پرمهال لفظي شخړه راغله.