Demonstrasjon på klimatoppmøtet i Baku

Hundrevis av aktivistar danna ei menneskekjede utanfor ein av hovudsalane på FNs klimatoppmøte i Baku, Aserbajdsjan, laurdag. Det melder NTB, som siterer nyheitsbyrået AP.

Det var fleire liknande demonstrasjonar verda rundt i samband med ein global aksjonsdag for klimarettferd, som no er ei årleg hending.

Aktivistane i Baku vifta med flagg, knipsa med fingrane og nynna og mumla slagord i ein stille protest, og mange hadde dekt munnen med ordet «silenced».

Demonstrantane heldt òg opp skilt med krav om meir satsing på klimatiltak, som inneber pengar til omlegging til rein energi og tilpassing til klimaendringane.

Forhandlarane i Baku jobbar for å få til ein avtale om dette. Framgangen har vore langsam, og observatørar seier at det framleis er uklart kva retning ein eventuell avtale vil ta.