Кос: Нема скратени патишта за пристапување во ЕУ

Не може да има скратени патишта во процесот на пристапување на која било земја во Европската Унија, но на Брисел е да ги поддржи најнапредните, порача еврокомесарката за проширување Марта Кос.

Зборувајќи на Форумот за проширување во Брисел, таа потсети дека проширувањето во 2004 донело 70 милиони луѓе во ЕУ кои Унијата успеала да ги интегрира, при што направи паралела и со најмалата држава од Западен Балкан, Црна Гора.

„Дали знаете колку е мала Црна Гора? Мала како една третина од Виена, мала како Тулуз или Штутгарт. Секако дека можеме да ја интегрираме Црна Гора“, рече Кос оценувајќи дека пристапувањето на Црна Гора нема да бара големи реформи во рамките на Европската унија.

На истиот форум учествуваше и црногорскиот премиер Милојко Спајиќ кој рече дека сега е „вистинскиот момент“ за проширување на ЕУ и дека Подгорица сака да го искористи тоа.

Црна Гора досега затвори седум од вкупно 33 поглавја во преговорите со ЕУ, а Спајиќ смета дека земјата ќе може да ги затвори сите до крајот на следната година.

„Нема да дозволиме брзината со која напредуваме да нè натера да не успееме во квалитетот на реформите. Сакаме да ги затвориме сите поглавја во рекордно време. И тоа нема да биде преседан, бидејќи други земји го направија тоа и сега се членки“, рече Спајиќ.

Покрај Црна Гора, Албанија е, исто така, меѓу најнапредните земји-кандидати за влез во ЕУ.

На 17 ноември, Тирана го отвори последниот кластер од преговарачкиот процес.

Албанскиот премиер, Еди Рама, претходно порача дека целта на неговата влада е да го заврши процесот на преговори до 2027 година и порача оти „ништо нема да не спречи кон членство во ЕУ во 2030“.

Албанија, која доби статус на кандидат за членство во 2014 година, го отвори првиот кластер во преговорите со ЕУ во октомври минатата година.

До тогаш, Албанија беше во „пакет“ со Северна Македонија, која е кандидат за членство во ЕУ од 2005 година.

Но, патот на Северна Македонија е закочен поради потребата од уставни измени, обврска што земјата ја презема со компромисот што беше постигнат околу преговарачката рамка во 2022, откако претходно во 2020 Бугарија стави вето за почеток на преговорите.

Северна Македонија, заедно со Албанија, во јули 2022 ја одржа прва меѓувладина конференција со Брисел, но за втора и за отворање на кластерите во рамки на преговорите со ЕУ, треба да ги направи уставните измени со кои ќе ја вметне бугарската заедница во Преамбулата од Уставот.