Двајца уапсени за кражба на накит од Лувр, објавија француските медиуми

Двајца осомничени се уапсени за кражба на скапоцени крунски накит од музејот Лувр во Париз, јавуваат француските медиуми.

Според „Ле Паризиен“, мажите се од париското предградие Сен-Сен Дени, а еден од нив е уапсен додека се подготвувал да се качи на лет од аеродромот Шарл де Гол.

Грабежот се случил минатата недела, кога четворица крадци вооружени со електрични алати влегле во музејот сред бел ден и ги зеле непроценливите предмети.

Министерот за правда на Франција признал дека безбедносните протоколи не успеале, што, според него, оставило „страшен впечаток“ врз земјата.

Ограбувачите пристигнале околу 9:30 часот наутро, кратко откако музејот се отворил за посетители. Тие користеле механички кран монтиран на возило за да се искачат на балконот на галеријата Аполо, во близина на реката Сена.

Фотографиите од местото на настанот покажуваат скали што водат до прозорец на првиот кат. Двајцата крадци влегле сечејќи прозорец со електрична алатка, а потоа им се заканувале на обезбедувачите, кои ја евакуирале областа, и сечејќи го стаклото на две витрини што содржеле накит.

Прелиминарниот извештај покажува дека една третина од собите во тој дел од музејот немале камери за надзор, објавија француските медиуми.

Полицијата соопшти дека крадците биле внатре само четири минути, пред да избегаат со два скутери што чекале пред музејот во 9:38 часот наутро.

Службениците потврдија дека безбедносните мерки се зголемени во сите културни институции низ Франција.