Комарци откриени за прв пат во Исланд

Три единки комарци се откриени во Исланд за прв пат во историјата, со оглед дека глобалното затоплување ја прави островската земја попогодна за нивно преживување.

До овој месец, Исланд беше едно од ретките места на планетата без популација на комарци - другото е Антарктикот.

Научниците долго време предвидуваа дека комарците би можеле да се населат во Исланд, со оглед на изобилството на соодветни живеалишта за размножување, како што се мочуриштата и езерцата.

Сепак, многу видови сè уште не се во можност да ја преживеат суровата клима.

Но, Исланд се затоплува четири пати побрзо од остатокот од Северната хемисфера.

Глечерите се топат, а рибите што нормално живеат во потоплите клими, како што е скушата, се појавија во исландските реки.

Како што планетата се затоплува, сè повеќе видови комарци се откриваат низ целиот свет.

Јајца од египетскиот комарец (Aedes aegypti) беа пронајдени во Велика Британија оваа година, додека азискиот тигрест комарец (Aedes albopictus) беше откриен во Кент.

Станува збор за инвазивни видови кои можат да пренесуваат тропски болести како што се денга треска, чикунгунија и вируси Зика.

Матијас Алфредсон, ентомолог во Исландскиот институт за природни науки, го потврди откритието. Тој лично ги идентификувал инсектите, кои му ги испратил граѓанин.

„Три единки од видот Culiseta annulata беа пронајдени во Кидафел, Ќос - две женски комарци и еден мажјак. Сите беа собрани со помош на стапици од јаже од лоза, кои обично се користат за привлекување молци“, рече тој.

жОвој вид комарец е отпорен на студ и може да ги преживее суровите услови во Исланд со презимување во подруми и шупи.