Мировни преговори меѓу Авганистан и Пакистан во Доха, во услови на кревко примирје

Авганистан и Пакистан ќе започнат мировни преговори на 18 октомври во главниот град на Катар, Доха, откако земјите се согласија да го продолжат 48-часовното примирје.

„Како што беше ветено, разговорите со пакистанската страна ќе се одржат денес во Доха“, изјави портпаролoт на авганистанската влада, Забихулах Муџахид, додавајќи дека делегацијата на Талибанците ќе ја предводи министерот за одбрана Мохамед Јакуб.

Пакистан и Авганистан доцна на 17 октомври се согласија да го продолжат 48-часовното примирје до завршувањето на разговорите во Доха, откако талибанските претставници го обвинија Пакистан за кршење на претходниот договор за примирје по воздушните напади на авганистанска територија доцна на 17 октомври, во кои наводно загинаа 10 цивили.

„Пакистан го прекрши примирјето и бомбардираше три локации во Пактика“, покраина во југоисточен Авганистан, изјави за новинската агенција Франс Прес висок талибански функционер под услов да остане анонимен.

Седум пакистански војници беа убиени и во самоубиствен напад во близина на авганистанската граница на 17 октомври. Милитантната група, порано поврзана со екстремистичката група Техрик-е Талибан Пакистан (ТТП), ја презеде одговорноста.

Неодамнешното насилство предизвика стравувања од тотална војна меѓу Пакистан и авганистанските талибанци, долгогодишни сојузници кои се разидоа.

Исламабад ги обвинува авганистанските талибанци дека им даваат засолниште на ТТП, која води сè посмртоносен бунт против Пакистан.

Авганистанските талибанци, кои ја презедоа власта во 2021 година, ги негираат обвинувањата.