Османи му го додели мандатот на Курти за составување нова влада

Претседателката на Косово, Вјоса Османи, во саботата му го додели мандатот на лидерот на движењето Самоопределување, Албин Курти, за составување нова влада, осум месеци по одржувањето на парламентарните избори.

Кабинетот на претседателката објави на Фејсбук дека Османи на 11 октомври ја потпишала уредбата за доделување на мандатот на Курти, кој во моментов ја извршува функцијата вршител на должност премиер.

Одлуката следува откако ден претходно беше конституирано Собранието на Косово со изборот на петтиот, последен потпретседател од редовите на српското малцинство.

„Оваа одлука е донесена по официјалниот предлог на партијата Движење Самоопределување, која освои најголем број пратенички места во Собранието врз основа на резултатите од изборите одржани на 9 февруари оваа година“, соопшти Кабинетот.

Според уставот, Курти има рок од 15 дена да му го претстави на Собранието составот и програмата на новата влада.

Сепак, Курти може да се соочи со потешкотии при обезбедувањето мнозинство од најмалку 61 глас во Собранието, кое брои вкупно 120 пратеници, за неговиот трет мандат, бидејќи неговата партија Самоопределување на изборите на 9 февруари освои само 48 места.

Потпретседателката на парламентот и пратеничка од Самоопределување, Албулена Хаџиу, изјави во петокот дека партијата е заинтересирана да најде коалициски партнер за управување со земјата.

Според неа, партијата е отворена за соработка со сите парламентарни партии, освен со Демократската партија на Косово (ПДК) и Српската листа.

„Отворени сме за разговори со пратеници од парламентарни групи или други политички субјекти. Имаше обиди со Демократскиот сојуз на Косово. Имаше контакти и со Социјалдемократската иницијатива, но тие не беа подготвени“, изјави Хаџиу.

Партијата на Курти исто така изрази подготвеност за соработка со претставниците на не-српските малцинства, кои имаат десет места во Собранието.

Ако не успее да обезбеди 61 глас, претседателката Османи мора во рок од десет дена да ги повика партиите на консултации и да го одреди кандидатот кој има најголеми шанси за формирање влада.

Во случај да не успее ниту вториот обид, според Уставот, претседателката мора да распише нови избори, кои треба да се одржат во рок од 40 дена.

Кандидатот на Демократската партија на Косово (ПДК) за премиер, Бедри Хамза, изјави во март дека неговата партија ќе ја преземе одговорноста за формирање влада ако Самоопределување не успее во законскиот рок.

ПДК, која има 24 пратеници, „нема црвени линии“ кон ниту една партија, изјави Хамза.

Демократскиот сојуз на Косово (ЛДК), кој има 20 места, и Алијансата за иднината на Косово (ААК), со пет места, ја исклучија можноста за коалиција со Движењето Самоопределување и изразија подготвеност за заедничко формирање влада.

Од друга страна, Социјалдемократската иницијатива (НИСМА) порача дека со своите три пратеници може да помогне во обезбедувањето на потребното мнозинство од 61 глас, заедно со Самоопределување и партиите од немнозинските заедници.