Фон дер Лајен: Европа мора да има капацитет за да одговори на хибридните закани

Претседателката на Европската комисија, Урсула фон дер Лајен ja повика Европа да стекне капацитет да одговори на хибридните закани по неодамнешните, како што се верува, руски упади во воздушниот простор на неколку европски земји.

„Време е да се нарече со неговото име. Тоа е хибридна војна. Европа мора да стекне капацитет да одговори и да го заштити своето небо“, рече Фон дер Лајен на седницата на ЕП посветена на неодамнешните руски нарушувања на воздушниот простор и критичната инфраструктура на земјите-членки на ЕУ.

Како што објави на својот профил на мрежата X, на седницата присуствува и Мари Бјер, министерка за надворешни работи на Данска, актуелниот претседател на ЕУ.

Фон дер Лајен оцени дека „нешто ново и опасно се случува“ на европското небо.

„Не треба само да реагираме, туку треба да одвратиме. Ако се двоумиме да дејствуваме, сивата зона само ќе се прошири“, рече таа во говорот пред Европскиот парламент во Стразбур.

Пратениците ќе гласаат за резолуција за ова прашање во четврток, 9 октомври.

Групата на социјалисти и демократи во ЕП на својот профил на мрежата X напиша дека руските нарушувања на воздушниот простор не претставува изолирани инциденти, туку „хибридно војување за тестирање на колективната подготвеност на Европа“.

„Мораме да ги зајакнеме нашите одбранбени капацитети преку подобрување на нашата способност за откривање, припишување и пресретнување на овие упади, во соработка со НАТО“, напиша групата на платформата X.

Во септември, три руски борбени авиони влегоа во естонскиот воздушен простор откако голем број руски беспилотни летала го пробија полскиот воздушен простор. Повторените прелетувања на беспилотни летала во Данска сериозно го нарушија данскиот воздушен сообраќај. Дронови неодамна беа забележани и на аеродромот во Минхен во Германија.