Британски тинк-тенк: протечени документи покажуваат дека Русија ѝ помага на Кина да се подготви за заземање на Тајван

Неодамна објавените 800 страници од договори и преписки покажуваат дека Русија ѝ помага на Кина да ја подготви својата војска за потенцијална инвазија на Тајван, според независен тинк-тенк кој ги примил досиејата и ги проверил независно.

Олександр В. Даниљук, соработник во Кралскиот институт за обединети служби, кој ги добил протечените досиеја заедно со неговиот коавтор, Џек Ватлинг, разговараа со РСЕ за тоа што значат наодите за идната воена соработка меѓу Кина и Русија и зошто Русија може да биде за кинеска инвазија на Тајван,автономниот остров со 23 милиони луѓе, што Пекинг го смета за своја територија.

Според наодите, документите укажуваат дека Москва се согласила во 2023 година да продаде пакет воена опрема на кинеската Народната армија, вклучувајќи јуришни возила, противтенковско оружје и оклопни транспортери. Оклопните возила би биле опремени со кинески спецификации, а Русија би обучила баталјон специјални кинески падобранци да ги користат.

Во договорите, исто така, се наведува дека Русија ќе и пренесе технологии на Кина што ќе ѝ овозможат да произведува слично оружје.

Таквиот договор би ги зајакнал капацитетите за воздушни маневри на Кина, една од ретките области каде што војската на Москва сè уште има предност и би ја интензивирало загриженоста дека Пекинг би можел да ја заземе инфраструктурата во внатрешноста дури и додека ги напаѓа пристаништата и плажите по должината на брегот како дел од потенцијална инвазија.

Приближно 800 страници договори и дополнителни материјали „изгледаат како вистински“, а деталите од документите се независно потврдени, соопштија од Институтот.

Сепак, постои и можност делови од документите да се изменети или изоставени, додаде тој.

Москва не коментираше за протечените документи.

Интервјуто подолу е уредено за да биде појасно.

РСЕ: Можете ли накратко да објасните кои се клучните елементи на тие договори и зошто се значајни за Пекинг во однос на потенцијална инвазија на Тајван?

Олександр В. Даниљук: Значи, со неколку зборови, договорот е за добивање многу специфична опрема што е потребна за операции за десант од воздух.

Тоа е комплет опрема за слетување на десантен баталјон, а исто така и специфична опрема за специјалните сили. И двата комплета се потребни за воздушна инвазија, што пак би ја поставило основата за поморска инвазија од страна на кинеската војска.

Идејата е всушност да се има тим за специјални сили на теренот и со користење на оваа руска опрема, тие би можеле да скокаат од цивилни товарни авиони од многу голема надморска височина и да се спуштат до тајванската територија без да бидат откриени. И тие би ги користеле овие автоматски системи за испорака на опрема - како руски десантни тенкови и борбени возила - таму, така што не секој [војник на специјалните сили] би требало да скокне со падобран во Тајван, многу од нив би можеле легално да влезат во Тајван како туристи однапред.

Веруваме дека овој силно опремен баталјон би бил само дел од поголем број баталјони, па можеби еден баталјон ќе користи руска опрема и два или три ќе користат кинеска опрема.

Тоа е доволно за преземање на контролата барем врз пристаништето Тајпеј, кое според нас е клучна цел за таква операција бидејќи им дава на Кинезите контрола врз витално пристаниште за претстојната поморска инвазија од страна на Народната армија.

РСЕ: Општото мислење отсекогаш било дека Русија е многу претпазлива во извозот на воена опрема во понапредните области во Кина од страв дека ќе биде злоупотребена и обратно инженерирана. Па зошто мислите дека тоа се менува сега и што значи тоа во иднина?

Даниљук: Политички, овој вид воена соработка е супер важен за Русите бидејќи тие не сакаат да бидат во овој клуб на целосно изолирани земји. Можеме да кажеме дека постои некаков вид оска на истомислечки земји [Забелешка на уредникот: аналитичарите почнаа да ја нарекуваат политичката и воената координација меѓу Кина, Русија, Иран и Северна Кореја „Оска на превирања“] и за Русите најважниот елемент на оваа оска е Кина.

Русија, исто така, инвестираше толку многу ресурси во средства за војна, а единствениот начин на кој тие средства можат да ги претворат во соодветна геополитичка сила е преку поширока, глобална војна. А најпосакуваниот театар за таа војна е Индо-Пацификот.

Значи, Русите се чини дека се подготвени да направат сè за да ја поттикнат Кина да го нападне Тајван, особено ако тоа би довело до вистински конфликт меѓу САД и Кина.

И мислам дека Русите не се заинтересирани за сценарио од типот на Крим за инвазија на Тајван, каде што има ограничен отпор и нема многу негативна меѓународна реакција. Напротив, Русите би сакале Кина да изврши инвазија, но да се запре нападот со блицкриг и да се оддоложи што е можно повеќе, бидејќи тоа всушност би создало можност за ескалација.

Потоа, тоа всушност би можело да ги вовлече Американците и некои други нации, како Јапонија, во војната, што верувам дека е она што тие го сакаат.

РСЕ: Добро, да резимираме, бидејќи мислам дека има многу за објаснување. Велите дека не само што овие документи ви укажуваат дека Москва би ја поддржала кинеската инвазија на Тајван, туку дека тие исто така бараат начини да влијаат на ситуацијата за да може тоа да се случи?

Даниљук: Да, апсолутно, така е.

Во моментов, не можете да влијаете врз кинеското општество на ист начин како што можете врз демократското и очекувам Русија да има некои лостови за влијание врз кинеската влада, иако тоа не го знам.

Но, најлесниот начин Русија всушност да ги создаде овие предуслови за да ја направи војната и инвазијата на Тајван да се чувствуваат неизбежни е всушност да влијае врз тајванското општество, а искрено, и врз американското општество и американската политика.

Во однос на тие предуслови во Тајван, погледнете што се случува во тајванската политика. Вистинската нулта фаза не е инфилтрација на специјални сили, туку всушност политичка дестабилизација.

Актуелната политичка ситуација во Тајван, каде што имате парламент, контролиран од Куоминтанг, а потоа [претседателот Лаи Чинг] од Демократската прогресивна партија (ДПП), се подели и поголемиот дел од изминатата година го помина блокирајќи закони и одложувајќи ги назначувањата на уставниот суд, што доведе до тепачки во парламентот и масовни протести.

Ова е идеален предуслов за обид за поттикнување политичка криза, што е потребна за дестабилизација на системот за команда и контрола во Тајван, и политички и воено.

РСЕ: Значи, покрај оваа воздушна способност наведена во документите што ги испитавте, кои се другите области за кои мислите дека кинеската војска би требало да бара од Русија да ги подобри во однос на потенцијална инвазија на Тајван?

Даниљук: Очигледно, тоа би билe некои повратни информации за руските ракетни и беспилотни напади.

Значи, како да ја потиснете воздушната одбрана, а исто така и како да ја исцрпите од муниција? Русија има многу неодамнешно искуство од прва рака со тоа и сето тоа е многу преносливо на сценариото за Тајван.

РСЕ: Имајќи го предвид овој вид воена соработка за која зборувавме, што друго очекувате од сценариото околу Тајван?

Даниљук: Мислам дека клучното прашање е до кој степен тајванското општество всушност може да избегне конфронтација и поларизација и дали може да се обедини околу потребата да се заштити островот, што е уште потешка задача.

Природната реакција од Вашингтон на ова е да му се дадат на Тајван повеќе воени капацитети, но според мене, тие имаат доволно капацитети.

Прашањето е повеќе дали тие всушност можат да бидат обединети и решени да се спротивстават и да се борат против инвазијата.

Инвазијата на Тајван би била исклучително скапа за Кинезите, па затоа вистинската опција против инвазијата на Тајван лежи во полето на моралот и единството, а исто така и во способноста на Соединетите Држави да понудат јасна порака за поддршка.

„Затоа што реалноста е прилично едноставна: Кина станува посилна, а во Европа сè уште има криза. Значи, ќе видиме.“