Сот Мадумаровдун арызын четке какты, УКМК беш адамды кармады

Улуттук коопсуздук боюнча мамлекеттик комитет Кыргызстанда бийликти күч менен басып алууну пландаган адамдардын тобу кармалганын билдирди. Алардын үйүн, автоунаасын тинтүүдө курал-жарак табылган. Жапырт кармалган 11 журналисттин соттук ишинде айыпталуучулар сурала баштады. Алгачкылардан болуп көрсөтмө берген Махабат Тажибек кызы коюлган айыптарды четке кагып, журналисттик иликтөөлөр үчүн Ички иштер министрлигинин кызматкерлери маалымат берип турганын айтты.

Улуу Британияда парламенттик шайлоодо Кир Стармер башында турган Лейбористтер партиясы ишенимдүү жеңишке жетип, өкмөттү башкаруу укугун алды. Консерваторлордун лидери, азыркы премьер-министр Риши Сунак жеңилгенин моюнга алып, Стармерди куттуктады.