Астанада жүргізушілер жолда төбелес шығарды

Астанадағы көшелердің бірінде екі жүргізуші төбелес шығарды. Оқиғаны жүк көлігімен өтіп бара жатқан куәгер видеоға түсіріп алған, - деп хабарлайды Tengrinews.kz тілшісі.
Оқиға орнынан түсірілген видео әлеуметтік желілерде жарияланды.

"Біздің оқырман Астанадағы жүргізушілердің төбелесін түсіріп алды. Абырой болғанда, басқа көлік жүргізушілері араласып, жанжалды тоқтатты. Қалай ойлайсыз, жолда неге агрессия көп? Осындай жағдайларға тап болып көрдіңіз бе?" – делінген видео сипаттамасында.

Кадрларда екі ер адамның бір-біріне соққылар жасап, жұдырықтасып жатқаны көрінеді. Төбелеске қатысушылардың бірінің жанындағы серігі оларды ажыратуға тырысады, бірақ сәтсіз. Кейінірек басқа жүргізушілер келіп, төбелесті тоқтатады.

Астана ПД баспасөз қызметінің басшысы Эльмира Шәуленованың айтуынша, құқықбұзушылар анықталып, "Нұра" аудандық полиция басқармасының уақытша ұстау бөлмесіне орналастырылған. Оларға қатысты ұсақ бұзақылық бойынша әкімшілік іс қозғалды. Жиналған материалдар әкімшілік сотқа жолданған.
Белгілі болғандай, жанжалдың себебі қарапайым – жүргізушілер жолды бөлісе алмаған. Елорда полициясы көлік жүргізушілерін жол қозғалысы ережелерін сақтауға, бір-біріне құрметпен қарауға және жолдағы жанжалдардан аулақ болуға шақырды.
Сілтемесіз жаңалық оқисыз ба? Онда Telegram желісінде парақшамызға тіркеліңіз!