Мемлекеттік кірістер комитеті “борышкер блогерлер“ тізіміне қатысты пікір білдірді

Мемлекеттік кірістер комитеті әлеуметтік желілерде тараған блогерлердің тізімі мен олардың болжамды табыстары туралы ақпаратқа пікір білдірді, - деп хабарлайды Tengrinews.kz тілшісі.
Ведомство бұл тізімнің ресми құжат емес екенін және жүргізіліп жатқан салықтық тексерулерге қатысы жоқ екенін атап өтті.

"Әлеуметтік желілерде тараған тізім – мемлекеттік кірістер органының салықтық бақылау аясында жасалған акт емес", – деп мәлімдеді комитет өкілдері.

Дегенмен, блогерлердің деректері салық органдарынан желіге қалай тарағаны белгісіз күйінде қалып отыр. Бұған дейін тізімдегі бірнеше инфлюенсер салық органдарынан хат алғандарын және оларды жасырған табыс сомалары бойынша айыптауларды растаған.
Біз бұл мәселе бойынша Ішкі істер министрлігіне ресми сұраныс жолдадық.
Еске сала кетейік, Қазақстан блогерлеріне миллиардтаған теңге болатын салық берешегі туралы хабарламалар жаппай келіп жатыр. Мемлекеттік кірістер комитетінің мәліметінше, 594 адам өз кірістерін 53,3 миллиард теңгеге төмендетіп көрсеткен. Блогер Алишер Елікбаев өз парақшасында кейбір әріптестеріне есептелген қосымша салық сомасы 300 миллион теңгеден асатынын жазды. Бұл олардың болжамды қаржылық айналымы шамамен 1 миллиард теңгені құрауы мүмкін екенін білдіреді.

Сілтемесіз жаңалық оқисыз ба? Онда Telegram желісінде парақшамызға тіркеліңіз!